O Mestrado en Tradución para a Comunicación Internacional pon en marcha o obradoiro «Activar espazos, crear públicos. Impacto, cidade e sostibilidade», unha proposta formativa intensiva e de carácter práctico impartida pola xestora cultural Patricia Verdial Garay.
Este obradoiro nace coa vocación de ofrecer ao estudantado ferramentas reais para deseñar, activar e avaliar programas públicos en museos e espazos culturais, entendidos como auténticos motores de dinamización económica, social e urbana. Ao longo das sesións, abordarase o papel estratéxico dos espazos culturais na construción de cidade e na relación entre institucións, cidadanía e territorio.
Un dos eixos centrais do obradoiro será o Edificio Redeiras, que funcionará non só como sede das sesións presenciais, senón tamén como caso de estudo vivo e laboratorio de prácticas. A partir deste espazo, explorarase como a universidade pode actuar como axente activo na vida cultural e urbana, xerando novas formas de participación e impacto.
Un enfoque aplicado para xerar impacto real
De carácter eminentemente aplicado, o obradoiro propón unha inmersión nas distintas dimensións que interveñen na programación cultural contemporánea: desde a reflexión e conceptualización ata a produción técnica, a organización, a xestión de recursos humanos, as alianzas estratéxicas e a medición do retorno.
O obxectivo é claro: crear proxectos culturais sostibles, capaces de xerar ingresos, fortalecer o tecido local e aportar valor ás institucións que os acollen. A metodoloxía combina análise, planificación e acción, promovendo unha mirada crítica sobre a cultura como ferramenta de desenvolvemento territorial e creación de públicos.
Alén de máis, o obradoiro inclúe traballo de campo, reforzando a aprendizaxe a través da experiencia directa e a aplicación práctica dos contidos.
Sobre a docente
Dende o Museo de Arte Contemporáneo MARCO de Vigo, Patricia Verdial Garay desenvolve unha traxectoria consolidada como xestora cultural e editora, con ampla experiencia en programación pública e mediación cultural con impacto sobre o territorio. Forma parte da sección de creación e artes visuais contemporáneas do Consello da Cultura Galega e colabora habitualmente en proxectos vinculados á universidade e á empresa.
O seu traballo céntrase na activación de comunidades e na xeración de valor social e económico a través da cultura contemporánea, unha perspectiva que atravesa e dá sentido a este obradoiro.
