O actual coordinador do Mestrado en Tradución para a Comunicación Internacional, Óscar Ferreiro Vázquez, atópase actualmente na Comisión Europea en Bruxelas para participar na primeira reunión da rede European Master’s in Translation (EMT) e recoller da man do director xeral da Dirección xeral de Tradución da Comisión Europea, Christos Ellinides, o documento que certifica a nosa entrada como membro de pleno dereito na EMT. A reunión, que se celebra os días 24 e 25 de outubro de 2024 no Centro de Conferencias Albert Borschette, marca o inicio oficial da rede EMT 2024-2029. Este evento reúne a representantes dos mestrados europeos en tradución, así como expertos da industria lingüística, para promover a colaboración e a excelencia na formación de tradutores profesionais.
Este recoñecemento sitúa o noso mestrado entre os programas de excelencia no eido da formación de tradutores en Europa. Tras un rigoroso proceso de avaliación, demostramos que cumprimos cos esixentes criterios de calidade e estándares establecidos pola Comisión Europea, o que nos permitiu formar parte da rede EMT para o período 2024-2029. Durante esta reunión, entregaranse os certificados de pertenza á rede a todos os membros recoñecidos.
Somos o único mestrado en Galicia e un dos oito en toda España que obtivo esta prestixiosa distinción, o que reforza a nosa posición como unha referencia na formación en tradución. Un logro que celebramos con gran orgullo!
Seguiremos traballando para manter estes altos estándares e contribuír activamente á mellora da calidade da tradución profesional no contexto europeo.
IMPACTO EN PRENSA
Atlántico (2 de novembro, 2024). Un máster de la UVigo obtiene un sello de calidad europeo. Dispoñible en: https://www.atlantico.net/articulo/universidad/master-uvigo-obtiene-sello-calidad-europeo/202411012000111057640.html
La Voz de Galicia (31 de outubro, 2024). El Máster en Traducción para la Comunicación Internacional obtiene el sello de calidad de Máster Europeo en Traducción. Dispoñible en: https://www.lavozdegalicia.es/noticia/vigo/2024/10/31/master-traduccion-comunicacion-internacional-obtiene-sello-calidad-master-europeo-traduccion/00031730366943433765658.htm
