O Máster en Tradución para a Comunicación Internacional (MTCI) volve situarse entre os mestrados de referencia do eido da tradución. O xornal La Voz de Galicia recolle na súa edición do 22 de xuño de 2026 a renovación da Mención de Excelencia concedida pola Xunta de Galicia, un recoñecemento que se estenderá ata o ano 2031 e que avala a calidade académica, a innovación docente e a proxección internacional do título. Na reportaxe, o coordinador do mestrado, Óscar Ferreiro Vázquez, fai balance dos principais fitos acadados nos últimos anos e pon en valor o traballo colectivo que permitiu consolidar o MTCI como unha referencia no Sistema Universitario Galego e no ámbito europeo da formación en tradución.
A información publicada destaca tamén o carácter internacional do MTCI, que na súa última convocatoria atraeu estudantes procedentes de catro continentes e de numerosos países, consolidándose como un dos títulos de posgrao máis atractivos do Sistema Universitario Galego (SUG).
Entre os fitos recentes do mestrado sobresae a súa integración na rede European Master’s in Translation (EMT) para o período 2024-2029. Esta acreditación, promovida pola Dirección Xeral de Tradución da Comisión Europea, distingue os programas universitarios que cumpren os máis altos estándares na formación de profesionais da tradución. O MTCI é actualmente o único máster galego presente nesta rede e un dos oito programas seleccionados en todo o Estado español.
A noticia tamén salienta o compromiso do mestrado coa internacionalización, a través de iniciativas como o convenio de dobre titulación coa Università degli Studi di Palermo, así como as oportunidades de prácticas en institucións europeas que ofrece ao seu estudantado.
