III Edición dos Premios ETIV-UVIGO á localización de videoxogos – Unha cita ineludible
O vindeiro venres 30 de maio ás 19:00 h, no Centro Comercial Vialia de Vigo acollerá a III Edición dos Premios ETIV-UVIGO á Localización de videoxogos, un evento no que o Mestrado en Tradución para a Comunicación Internacional (MTCI) —Mestrado Universitário com Excelência da Xunta de Galicia e membro da prestixiosa rede de mestrados europeos en Tradución European Master’s in Translation (EMT) da Dirección Xeral de Tradución (DXT) da Comisión Europea— e o título propio de Especialista en Tradución para a Industria do Videoxogo (ETIV) teñen un papel protagonista como coorganizadores, xunto co grupo de investigación TI4 Tradución & Paratradución.
Antes da gala, ás 18:00 h, terá lugar unha actividade previa moi especial e aberta a todo o público: un trivial interactivo con formato lúdico e dinámico, no que se repartirán numerosos agasallos entre as persoas participantes. Un momento perfecto para xuntarnos, divertirnos e facer comunidade arredor da localización de videoxogos.
Estes premios naceron no marco do título propio de Especialista en Tradución para a Industria do Videoxogo (ETIV), que xa vai pola súa oitava edición, e que cada curso reúne estudantes dos diversos títulos da Facultade de Filoloxía e Tradución, do MTCI e doutras titulacións afíns de toda Galicia, España e mesmo doutros países.
A gala contará coa presenza de representantes institucionais, académicos e profesionais, unha mostra clara do peso e recoñecemento que está a acadar este proxecto nacido no seo da nosa universidade.
Este ano, ademais, o cambio de localización ao Centro Comercial Vialia responde ao desexo de abrir o evento á cidadanía e reforzar a súa proxección como referente estatal na localización de videoxogos.
Dende a organización dos premios animámosvos a asistir, participar, compartir e celebrar esta festa da tradución e do talento! A vosa presenza é fundamental para continuar dando visibilidade ao noso traballo e paixón pola localización.
Podedes consultar máis información e fotos de edicións anteriores na web oficial dos premios: http://premios.etiv.webs.
CATEGORÍAS DOS PREMIOS
